غزل
ياره د کلي نــــــــه تر ښاره چې تر څو به مرو
داسې بې باکه بـې اختياره چې تر څو به مرو
سمه ده شور نۀ کوؤ جنګ نۀ کوؤ ننګ نۀ کوؤ
ښه نــو تۀ اوايه اوښياره چې تر څو بـــه مرو
ښـــه نو تر کومې تماشې او جنـــــــــازې وکړو
تاســـــو ويستلې کومه لاره چې تر څو به مرو
ښه زۀ ماښام يم زما سترګې لۀ تيارو ډکې دي
ښۀ نو تـــــــه اوايـه سهاره چې تر څو به مرو
د کليمې پــــــۀ نوم جوړ شويا رياسته زما
اے د ژونــــدو خلکو مزاره چې تر څو به مرو
حسينه غږ کول هــــــــم لويا غداري ده دلته
تۀ داسې مۀ وايــه غداره چې تر څو به مرو
 |
| Hussain Shah bajuar |